ອົງປະກອບທີ່ສໍາຄັນຂອງ ສາສນາພຸດ ຫຼື ພຸດທະສາສນາ ມີຫຍັງແດ່?

   ສາສນາພຸດ ກໍ່ເຊັ່ນດຽວກັນກັບທຸກໆ ສາສນາໃນໂລກທີ່ມີຄວາມເປັນມາ ແລະ ຕ້ອງດຳລົງຄົງຕົວສືບຕໍ່ໄປນານເທົ່າທີ່ອົງປະກອບຂອງສາສນາສາມາດຂັບເຄື່ອນໄປຢ່າງເປັນລະບົບ ແລະ ປະສານສໍາພັນກັນໄປຢ່າງດີ ມີປະສິດທິພາບ ແລະ ຄຸນນະພາບ ໂດຍທົ່ວໄປແລ້ວສາສນາທຸກສາສນາ ຈະຕ້ອງມີອົງປະກອບສໍາຄັນຢູ່ 4 ຢ່າງດ້ວຍກັນ, ສໍາລັບພຸດທະສາສນາຂອງເຮົານັ້ນ ແມ່ນມີດັ່ງນີ້:

1.)ຫຼັກທັມຄໍາສອນ ຫຼື ພຣະທັມ ເຊິ່ງເປັນຄໍາສອນຂອງອົງສົມເດັດສັມມາສັມພຸດທະເຈົ້າ ທີ່ປະກົດຢູ່ໃນພຣະຄໍາພີ ທີ່ຊື່ວ່າ ພຣະໄຕຣປີດົກ, ທີ່ບັນດາພຣະອະຣິຍະສົງເຈົ້າໃນຍຸກຕ່າງໆໄດ້ບັນທຶກ ຄັດລອກສືບທອດກັນມາ ຈົນມາເຖິງຍຸກປັດຈຸບັນ ຄໍາສອນດັ່ງກ່າວ ຍັງຄົງດຳລົງ ແລະ ເປັນຈິງສະເໝີມາ, ພຣະໄຕຣປີດົກ ແບ່ງອອກເປັນ 3 ພາກສ່ວນຫຼັກໆ ປະກອບດ້ວຍ ພຣະວິນັຍປີດົກ, ພຣະສຸດຕັນຕະປິດົກ(ຫຼື ພຣະສູດ) ແລະ ພຣະອະພິທັມ, ເນື້ອໃນຄໍາສອນຂອງພຸດທະສາສນາ ລວມໆແລ້ວ ແມ່ນແນ່ໃສ່ຜົນສາມປະການຄື 1.​ ສອນໃຫ້ລະເວັ້ນຈາກການກະທຳຄວາມຊົ່ວທັງປວງ,​  2. ແນະແນວທາງໃຫ້ປະຕິບັດຕົນໄປທາງທີ່ດີ ແລະ 3.​ ຄື ສອນໃຫ້ໝັ່ນເຝິກຈິດໃຈໃຫ້ຜ່ອງໃສ ຫຼື ສະຫຼຸບ ກໍ່ຄືໃຫ້ລະເວັ້ນກຳຊົ່ວ ສ້າງຄວາມດີ ແລະ ທຳຈິດໃຈໃຫ້ຜ່ອງໃສ.

ພາບ ຕູ້ເກັບມ້ຽນໜັງສືພຣະໄຕຣປີດົກ

 2.)ພຸດທະບໍລິສັດ ແມ່ນບັນດາບຸກຄະລາກອນໃນພຣະພຸດທະສາສນາ ເອີ້ນວ່າ ພຸດທະສາສະນິກກະຊົນ ເຊິ່ງປະກອບມີ ພິກຂຸ(ຄູບາ, ຈົວ), ພິກຂຸນີ(ພຣະຜູ້ຍິງ,ຈົວຜູ້ຍິງ) ອຸປະສົກ(ພໍ່ອອກ) ແລະ ອຸບາສິກາ(ແມ່ອອກ) ລວມກັນເຮົາເອີ້ນວ່າ ພຸດທະບໍລິສັດທັງ4, ແຕ່ລະສ່ວນເຮັດໜ້າທີ່ຕ່າງກັນ ໂດຍມີເປົ້າໝາຍຫຼັກຢ່າງດຽວກັນຄື ທະນຸບໍາລຸງ ແລະ ສືບທອດພຣະພຸດທະສາສນາເປັນສໍາຄັນ, ພຸດທະບໍລິສັດ4 ເປັນພາກສ່ວນຜູ້ຂັບເຄື່ອນພຸດທະສາສນາທີ່ສໍາຄັນ ເປັນຜູ້ທະນຸບໍາລຸງ, ເສີມຂະຫຍາຍ, ປະຕິບັດ ຕາມຫຼັກທັມຄໍາສອນ ແລະ ເລື່ອງອື່ນໆ, ພຸດທະບໍລິສັດທັງ4ນີ້ ລ້ວນແລ້ວແຕ່ມີການພົວພັນຢ່າງສະນິດແໜ້ນ ມີບົດບາດ ແລະ ມີໂອກາດໄດເຂົ້າເຖິງຈຸດສູງສຸດຫຼັກທັມຄໍາສອນໄດ້ເທົ່າກັນ ແລະ ສະເໝີພາບກັນທັງນັ້ນ.

ພາບ: ພໍ່ອອກ ແທ່ອອກໃສ່ບາດ ທີ່ເມືອງຫຼວງ

 3.)ພຸດທະພິທີກຳ ໝາຍເຖິງພິທີກຳຕ່າງໆຂອງສາສະນາພຸດ ເປັນຮູບແບບການປະຕິບັດໃນລະດັບຕ່າງໆໃນຍາມເຮັດບຸນກັນເຊັ່ນ: ການສູດມົນເພື່ອລະນຶກເຖິງຄຸນພຣະສີລັດຕະນະໄຕຣ, ການປະຕິບັດເພື່ອເຮັດໃຫ້ຈິດໃຈສະຫງົບ, ລະເວັ້ນຈາກການກະທຳຄວາມຊົ່ວ ໂດຍຕັ້ງໃຈກະທຳຄວາມດີ, ພິທີກໍາທີ່ສໍາຄັນ ເຊັ່ນ ພິທີອຸປະສົມບົດ, ພິທີເຮັດບຸນເນື່ອງໃນໂອກາດຕ່າງໆ. ໂອກາດວັນສໍາຄັນທາງພຣະພຸດສາສນາ ເຊັ່ນ ວັນມາຄະບູຊາ, ວັນອາສາລະຫະບູຊາ(ບຸນເຂົ້າພັນສາ), ບຸນວິສາຂະບູຊາເປັນຕົ້ນ. ສາສນາພິທີ ສາມາດສ້າງຄວາມັກຄີຝູງຊົນ ໃຫ້ເປັນໜຶ່ງໃຈດຽວກັນ, ບົ່ງບອກເຖິງຄວາມເປັນເອກະລັກຂອງຊາດທາງດ້ານຮີດຄອງ-ປະເພນີ-ວັດທະນະທຳ ສະນັ້ນ; ສາສະນາພິທີ ຈຶ່ງມີຄວາມສໍາຄັນ ທັງພາຍໃນ ແລະ ພາຍນອກໄປດ້ວຍກັນ.

ພາບ ພຣະສົງກຳລັງໄຫວ້ພຣະ ສູດມົນຮ່ວມກັນ

4.)ພຸດທະສະຖານ ແລະ ວັດຖຸສໍາຄັນ, ສະຖານທີ່ສໍາຄັນທາງສາສະນາພຸດ ເຊິ່ງມີ ສັງເວຊະນີຍະສະຖານ ທີ່ເປັນສະຖານທີ່ພຣະພຸດທະເຈົ້າປະສູດ, ຕັດສະຮູ້, ແລະ ປະລິນິບພານ, ວັດ, ໂບດ, ວິຫານ,  ສໍາລັບສາສະນາວັດຖຸຄືໝາຍເຖິງວັດຖຸຕ່າງໆ ທີ່ເປັນຂອງພຸດທະສາສະນາ ທີ່ມີຄວາມສໍາຄັນໄດ້ແກ່ ພຣະໄຕຣປີດົກ, ພຣະພຸດທະຮູບ ຊຶ່ງເປັນສັນຍາລັກຂອງພຣະພຸດທະອົງ ນອກນັ້ນ ກໍ່ມີວັດຖຸມົງຄຸນຕ່າງໆ ຊຶ່ງສ້າງຂື້ນເພື່ອໃຫ້ສາທຸຊົນໄດ້ຍຶດໜ່ຽວ ແລະ ເຕືອນສະຕິ ເພື່ອລະເວັ້ນການກະທຳຄວາມຊົ່ວໂດຍໃຫ້ກະທຳດີ.

ພາບ: ພຸດທະສັງເວຊະນີຍະຖານ ປະເທດອິນເດຍ

ນອກນັ້ນ ຍັງມີສັນຍາລັກຕ່າງໆ ເຊິ່ງກໍ່ເປັນສ່ວນອົງປະກອບທີ່ສໍາຄັນເຊັ່ນດຽວກັນເຊັ່ນ ພາບທັມມະຈັກ, ແລະ ທຸງຫຼາກສີ ເຊິ່ງເປັນສັນຍາລັກ ເຊີ້ງສະເພາະພິເສດ.

ອົງການພຸດທະສາສນາສຳພັນລາວ ແມ່ນອົງການແນວໃດ? ແລະ ປະຫວັດ ຄວາມເປັນມາຂອງແນວໃດ?

ອົງການພຸດທະສາສະນາສຳພັນລາວ ຫລື ມີຊື່ຫຍໍ້ວ່າ ອພສ.(ພາສາອັງກິດ:Lao Buddhist Fellowship Organization) ມີສຳນັກງານສູນກາງ ອພສ ທີ່ເຄື່ອນໄຫວກິດຈະກຳທາງດ້ານສາສະນາ ຢູ່ທີ່ວັດທາດຫລວງເຫນືອ ເມືອງໄຊເສດຖາ ນະຄອນຫລວງວຽງຈັນ ເປັນອົງການຫນຶ່ງ ທີ່ສ້າງຕັ້ງຂຶ້ນເພື່ອເຄື່ອນໄຫວວຽກງານທາງດ້ານສາສະນາ ສິນລະທຳ ຖືກຕ້ອງຕາມກົດຫມາຍຂອງ ສາທາລະນະລັດ ປະຊາທິປະໄຕ ປະຊາຊົນລາວ ເປັນອົງການທີ່ຄຸ້ມຄອງ ພຣະພຸດທະສາສະນາໃນ ສປປ. ລາວ ແລະສາມາດເຄື່ອນໄວເຜີຍແຜ່ຫລັກທັມຄຳສອນໃນທາງພຣະພຸດທະສາສະນາໃຫ້ປະຊາຊົນລາວໃຫ້ຮູ້ ໃນ ບາບ, ບຸນ ຮູ້ຈັກຫລັກຂອງສີລທັມ ແລະຈະຣິຍະທັມຂອງ ອົງສົມເດັດສຳມາສໍາພຸທເຈົ້າຫລາຍຂື້ນ.  

ຮູບພາບ ກາທັມມະຈັກ ສັນຍາລັກແທນ ມັກມີອົງແປດ

ອົງການພຸດທະສາສະນາສໍາພັນລາວ ເປັນອົງການທີ່ມີພາລະບົດບາດ, ສິດ ແລະ ໜ້າທີ່ ໃນການຄຸ້ມຄອງບໍລິຫານ, ເຜີຍແຜ່ສີລະທັມ, ການສຶກສາສົງ, ການບູລະນະກໍ່ສ້າງ, ການຈັດຕັ້ງປະຕິບັດພຣະທັມມະວິໄນ, ເຕົ້າໂຮມຄວາມສາມັກຄີພຸດທະສາສະນິກະຊົນບັນດາເຜົ່າ ແລະ ການພົວພັນສາກົນກ່ຽວກັບສາສນາ ພາຍໃຕ້ຂອບເຂດຄວາມຮັບຜິດຊອບຂອງຕົນ.ພຣະພູດທະສາສະນາໃນປະເທດລາວ ເປັນພຣະພຸດທະສາສະນາແບບເຖຣະວາດ ຫລືມະຫານິກາຍ ເອີ້ນວ່າ ''ພຣະສົງລາວ'' ອົງການດັ່ງກ່າວ ແມ່ນລັດຖະບານລາວ ,ແນວລາວສ້າງຊາດ ແລະ ຊາວສາສະນາສະນິກກະຊົນລາວທົ່ວປະເທດເປັນຜູ້ອຸປະຖຳ.

ການບໍລິຫານຈັດການ ຂອງ ອພສ ແບ່ງອອກເປັນຂັ້ນ ສາຍໄຍຕ່າງໆ ເຊິ່ງເຮັດໜ້າທີ່ປະສານຕໍ່ວຽກງານຈາກສູນກາງໄປທ້ອງຖິ່ນ ໃນການດຳເນີນກິດຈະການງານບຸນສາສນາຕ່າງໆ ເພື່ອໃຫ້ວ່ອງໄວ ທົ່ວເຖິງ ແລະ ມີປະສິດທິພາບ. ນອກນັ້ນກໍ່ເພື່ອເຮັດໃຫ້ການເຄື່ອນໄຫວວຽກງານ ໃຫ້ສອດຄ່ອງກັບລັດຖະທຳມະນູນຂອງສົງ ແລະ ລະບຽບກົດໝາຍຂອງຝ່າຍບ້ານເມືອງ. ຫ້ອງການຂອງ ອພສ ແມ່ນມີຢູ່ທົ່ວປະເທດຕາມລໍາດັບ ແລະແບ່ງອອກເປັນຂັ້ນຕ່າງໆ ມີລະບົບການບໍຣິຫານງານສູນກາງ ອພສ  3 ຄະນະ, 4 ກັມມາທິການ ແລະ 1  ຫ້ອງການສູນກາງ ອພສ.ດັ່ງນີ້:

ຄະນະປະຈຳ ຫ້ອງການແຕ່ລະກຳມາທິການ

1.    ຄະນະປະຈຳສູນກາງ ອພສ.

2.   ປະທານແລະຮອງປະທານ ສູນກາງ ອພສ.

3.   ຄະນະບໍຣິຫານງານສູນກາງ ອພສ.

ກັມມາທິການຕ່າງໆໃນລະບົບສາຍໄຍການບໍລິຫານຂອງ ອພສ

1.     ກັມມາທິການປົກຄອງສົງ

2.    ກັມມາທິການສຶກສາສົງ

3.    ກັມມາທິການເຜີຍແຜ່ສີລທັມແລະປະຕິບັດກັມມາຖານ

4.    ກັມມາທິການສາທາຣະນູປະການ

ຫ້ອງການສູນກາງ ອພສ.

    I.      ປະຫວັດຄວາມເປັນມາຂອງ ອົງການພຸດທະສາສນາສໍາພັນລາວ

ໃນປີ ຄ.ສ. 1960 ເມື່ອກະແສແຫ່ງການຕໍ່ສູ້ກູ້ຊາດ ພາຍໃນປະເທດໃນສະໄໝນັ້ນ ໄດ້ສ້າງເງື່ອນໄຂ ແລະເປັນປັດໃຈ ໃຫ້ແກ່ຄະນະສົງທົ່ວປະເທດ ແລະອອກຕົນຍາດໂຍມ ປຶກສາຫາລຶກັນໃນການສ້າງ ຄວາມສາມັກຄີພາຍໃນຊາດສາສະນາ ໃຫ້ມີຂຶ້ນ ເພາະໃນສະໄໝກ່ອນ ປວງຊົນຊາວລາວໃນທົ່ວປະເທດ ຍັງບໍ່ທັນເປັນຫນຶ່ງດຽວ ບໍ່ມີອົງກອນນຳພາ ໃນການສ້າງຄວາມສາມັກຄີ ຕ່າງຝ່າຍຕ່າງສູ້ຕາມກຳລັງຂອງຕົນເອງ ໃນແຕ່ລະເຂດ. ໂດຍມີປະນິທານປະຊາທິປະໄຕ ພາຍໃຕ້ສີລະທັມ ທີ່ວ່າ “ພຣະສົງບໍ່ຕັດແຍກອອກຈາກ ອອກຕົນຍາດໂຍມ, ພຣະພຸດທະສາສະນາບໍ່ຕັດແຍກອອກຈາກຊາດ, ສີລະທັມບໍ່ຕັດແຍກອອກຈາກການເມືອງ ” ຊາດໄດ້ວາງເປົ້າຫມາຍຢ່າງໃດ ພຣະສົງ -ສາມະເນນໄດ້ຖືເອົາເປັນເປົ້າຫມາຍຢ່າງນັ້ນ ພ້ອມກັບຄວບຄູ່ໄປດ້ວຍ ຫລັກພຣະທັມ ວິນັຍ ຍຶດຖື ຄວາມມີສະເຫມີພາກ ທັງທາງດ້ານຄຸນນະທັມແລະຈະຣິຍະທັມ ອັນເປັນຫລັກຄຳສອນໃນທາງພຣະພຸດທະສາສະນາ ດັ່ງນັ້ນ ຕາມຄວາມຮຽກຮ້ອງຂອງສະພາບບ້ານເມືອງ ແລະ ຕາມຄວາມສັດທາ ຂອງສາສະນິກກະຊົນ ອົງການພຸດທະສາສະນາສໍາພັນລາວຈຶ່ງໄດ້ກໍ່ກຳເນີດ ແລະ ໄດ້ເຄື່ອນໄຫວ ສົ່ງເສີມອົບຮົມສີລະທັມໃຫ້ປະຊາຊົນລາວເຮົາ ຕາມນະໂຍບາຍທາງດ້ານຝ່າຍສົງ ແລະ ຝ່າຍພັກລັດ ບ້ານເມືອງສະເໝີມາ

1.   ກອງປະຊຸມໃຫຍ່ຜູ້ແທນພຣະສົງທົ່ວປະເທດຄັ້ງທີ 1

ຕໍ່ມາເມື່ອອົງການພຸດທະສາສະນາສຳພັນລາວ ໄດ້ດຳເນີນງານການເຄື່ອນໄຫວໄປໃນລະຍະຫນຶ່ງ ຈິ່ງເຫັນວ່າ ລະບົບການຈັດຕັ້ງ ແລະການບໍຣິຫານງານຄວນປັບປຸງມໃຫ້ດີຂຶ້ນກວ່າເກົ່າ ດັ່ງນັ້ນ; ໃນປີ ພ.ສ. 2504 (ຄ.ສ. 1962) ໂດຍໄດ້ເຫັນດີເປັນເອກະພາບ ຈາກສູນກາງແນວລາວຮັກຊາດ ໃຫ້ເປີດກອງປະຊຸມໃຫຍ່ ຄັ້ງທີ I ຂອງອົງການພຸດທະສາສະນາສຳພັນລາວ ໃນວັນທີ 3 ເດືອນ ມິຖຸນາ ຄ.ສ.1962 ທີ່ ວັດໂພນສະຫວັນ ເມືອງແປກ ແຂວງຊຽງຂວາງ ມີພຣະສົງ ເຂົ້າຮ່ວມທັງຫມົດ 160 ອົງ ໂດຍມີ ພຣະອາຈານໃຫຍ່ມະຫາບົວຄຳ ວໍຣະເພັດ ເປັນອົງອາວຸໂສ ມີພັນສາຫລາຍກວ່າ ອົງອື່ນ ກອງປະຊຸມໃຫຍ່ດັ່ງກ່າວ ເຫັນດີ ເປັນເອກະສັນ ແຕ່ງຕັ້ງພຣະສົງ 15 ອົງ ເປັນຄະນະບໍຣິຫານງານຂອງອົງການພຣະພຸດທະສາສະນາສຳພັນລາວ ໃນນັ້ນມີ ຮອງປະທານ 2 ອົງ ພຣະອາຈານມະຫາຄຳຕັນ ເທພບົວລີ ເປັນປະທານອົງການພຸດທະສາສະນາສໍາພັນລາວ ແລະພຣະອາຈານໃຫຍ່ມະຫາບົວຄຳ ວໍລະເພັດ ເປັນປະທານກິດຕິມະສັກ. ສ່ວນທາງດ້ານສູນກາງແນວລາວຮັກຊາດໄດ້ເຂົ້າຮ່ວມກອງປະຊຸມໃນຄັ້ງນັ້ນ ມີ:

1.   ທ່ານຫນູຮັກ ພູມສະຫວັນ

2.  ທ່ານສິງກະໂປ ສີໂຄດຈຸນລະມະນີ

3.  ທ່ານປ້າເພັຽຄຳສຸກ ວົງວິຈິຕ

4.  ທ່ານເດືອນ ສຸນນະລາດ

ແລະ ອີກຫລາຍໆ ທ່ານ ລວມທັງໝົດ 20 ທ່ານ ກອງປະຊຸມໃຫຍ່ພຣະສົງໃນຄັ້ງນັ້ນໄດ້ ຜ່ານກົດລະບຽບໂຄງສ້າງດຳເນີນງານຢູ່ 7 ຫົວຂໍ້ ສືບຕໍ່ນຳພາພຣະສົງ - ສາມະເນນ ຄຽງຄູ່ກັບແນວລາວຮັກຊາດ ເພື່ອສ້າງຄວາມເປັນເອກະພາບ ສັນຕິພາບ ປະຊາທິປະໄຕ ໃນສັງຄົມລາວໃຫ້ມີຂຶ້ນ ໂດຍນຳຫລັກສີລະທັມທາງພຣະພຸດທະສາສະນາ ນອກຈາກນີ້ ເພື່ອໃຫ້ ຊາດ ແລະສາສະນາ ຄຽງຄູ່ໄປດ້ວຍກັນ ຈຶງປະສົມປະສານກັບນະໂຍບາຍຂອງແນວລາວຮັກຊາດ ເມື່ອກອງປະຊຸມໃຫຍ່ໄດ້ສຳເລັດ ໄດ້ມີມະຕິຕົກລົງ ແບ່ງຫນ້າທີ່ຂອງແຕ່ລະເມືອງ ພາຍໃນ ແຂວງຊຽງຂວາງ ໂດຍແບ່ງເປັນ 5 ຕົວເມືອງ

1.   ເມືອງແປກ

2.  ເມືອງຄຸນ

3.  ເມືອງຄຳ

4.  ເມືອງຫນອງແຮດ

5.  ເມືອງສູ້ຍ

ນອກຈາກນັ້ນ ຍັງໃຫ້ໄປປະຈຳຢູ່ ເມືອງຍົມມະລາດມະຫາໄຊ, ແຂວງຫົວພັນ ແລະອີກຫລາຍໆແຂວງທາງພາກເຫນືອຂອງລາວ ໂດຍຖືເອົາແຂວງຊຽງຂວາງ ແລະແຂວງຫົວພັນເພື່ອເຄື່ອນໄຫວວຽກງານເຜີຍແຜ່ສີລທັມ ໃຫ້ເຂົ້າເຖິງອອກຕົນຍາດໂຍມ

2.   ກອງປະຊຸມໃຫຍ່ຜູ້ແທນພຣະສົງທົ່ວປະເທດຄັ້ງທີ 2

ກອງປະຊຸມໃຫຍ່ພຣະສົງທົ່ວປະເທດຄັ້ງທີ 2 ໄດ້ໄຂຂຶ້ນຢ່າງເປັນທາງການ ໃນ ວັນທີ 6 ເດືອນ 6 ຄ.ສ. 1976 ທີ່ມະຫາກຸຕິ ວັດທາດຫລວງເຫນືອ ນະຄອນຫລວງວຽງຈັນ ໂດຍມີຜູ້ແທນພຣະສົງເຂົ້າຮ່ວມທັ້ງຫມົດ 79 ອົງ ໃນທົ່ວປະເທດ ຈຸດປະສົງຂອງການປະຊຸມໃຫຍ່ໃນຄັ້ງນີ້ ແມ່ນ: ຍຶດອຳນາດການປົກຄອງສົງໃນລະບອບເກົ່າ ແລະສ້າງຕັ້ງລະບອບໃຫມ່ ແລະສ້າງຕັ້ງອົງປະທານຄະນະສົງຂຶ້ນໃຫມ່ ຄະນະຜູ້ແທນຝ່າຍບ້ານເມືອງມີບຸກຄົນສຳຄັນເຂົ້າຮ່ວມ ດັ່ງນີ້

1.   ສົມເດັດເຈົ້າສຸພານຸວົງ ປະທານປະເທດໃນສະໄໝນັ້ນ

2.  ສົມເດັດເຈົ້າສຸວັນນະພູມມາ ທີ່ປຶກສາລັດຖບານ

3.  ພະຍາພູມມີ ວົງວິຈິຕ ລັດຖະມົນຕີກະຊວງສຶກສາທິການກິລາ ແລະທັມມະການ

4.  ທ່ານມະຫາສຸວັນນະເມທີ ລັດຖະມົນຕີກະຊວງຍຸຕິທັມ

ມີບຸກຄົນສຳຄັນອື່ນອີກ 16 ທ່ານ ທີ່ເຂົ້າຮ່ວມໃນກອງປະຊຸມໃນຄັ້ງນັ້ນ ຄະນະຈັດຕັ້ງໄດ້ ຈະເຣີນພອນ ເຊີນ ພະຍາພູມີ ວົງວິຈິຕ ອອກຄວາມຄິດ ຄວາມເຫັນ ໃນທີ່ປະຊຸມກ່ອນ ແຕ່ທ່ານພະຍາພູມີ ວົງວິຈິຕ ເຊີນສົມເດັດປະທານ ສຸພານຸວົງ ໃຫ້ສະແດງຄວາມຄິດເຫັນກ່ອນ ໃນທີ່ປະຊຸມ ຕໍ່ຈາກນັ້ນຈິ່ງເປັນພະຍາພູມີ ວົງວິຈິຕ ຄະນະຜູ້ແທນໃນທີ່ປະຊຸມໄດ້ຕົກລົງ ເປັນເອກະສັນ ຮັບຮອງເອົາ ເອົາມະຕິ 9 ຂໍ້ ເອີ້ນວ່າ “ມະຕິ33” ເນື້ອຫາ ໃນມະຕິ 9 ຂໍ້ນັ້ນ ສະຫລຸບວ່າ “ລົບລ້າງພຣະພຸດທະສາສະນາແບບທັມຍຸຕຕິກະນິກາຍ ແລະພຣະພຸດທະສາສະນາແບບມະຫານິກາຍ ຢ່າງສິ້ນເຊີງ ເພື່ອຈະເອົາພຣະພຸດທະສາສະນາທັ້ງ ສອງນິກາຍນີ້ລວມເຂົ້າດ້ວຍກັນ ເອີ້ນວ່າ “ຄະນະສົງລາວ”  ເທົ່ານັ້ນ ອົງການພຸດທະສາສະນາສຳພັນລາວ ເປັນອົງການດຽວທີ່ຈັດຕັ້ງຂຶ້ນ ຖືກຕ້ອງ ຕາມກົດຫມາຍ ເຊິ່ງມີບົດບາດ ຫນ້າທີ່ ໃນການຄຸ້ມຄອງພຣະພຸດທະສາສະນາ ນຳພາພຣະສົງ-ສາມະເນນ ເຜີຍແຜ່ສີລທັມໃຫ້ເຂົ້າເຖິງຊາວບ້ານໃນທົ່ວປະເທດ ແລະພັນທະນາປະເທດຊາດຄ່ຽງຄູ່ໄປດ້ວຍກັນ ໃນການປະຊຸມຄັ້ງນັ້ນໄດ້ເລືອກຄະນະປະທານກິຕຕິມະສັກ 4 ອົງ ຄະນະບໍຣິຫານງານສູນກາງ ອ.ພ.ສ. 30 ອົງ ແລະຄະນະປະຈຳ ອີກ 9 ອົງ ເຊິ່ງແມ່ນພຣະອາຈາຣຍ໌ມະຫາຄຳຕັນ ເທບບົວລີ ເປັນປະທານ ອົງການພຣະພຸດທະສາສະນາສຳພັນລາວ

3.   ກອງປະຊຸມໃຫຍ່ຜູ້ແທນພຣະສົງທົ່ວປະເທດຄັ້ງທີ 3

ເພື່ອເຮັດໃຫ້ພຣະພຸດທະສາສະນາໃນທົ່ວປະເທດຫມັ້ນຄົງ ແລະອອກຕົນຍາດໂຍມຮູ້ຈັກພຣະພຸດທະສາສະນຫລາຍຂຶ້ນ ຈາກທີ່ເຄີຍນັບຖືຜີສ້າງ ເທວະດາ ໂດຍທົ່ວກັນນັ້ນ ກອງປະໃຫຍ່ຜູ້ແທນພຣະສົງທົ່ວປະເທດຄັ້ງທີ່ສາມ ກໍໄດ້ໄຂຂຶ້ນໃນ ວັນທີ່..... ເດືອນ 9 ປີ ຄ.ສ. 1987 ທີ່ ວັດອູບມຸງ ນະຄອນຫຼວງວຽງຈັນ ໂດຍມີພຣະສົງພາຍໃນ  ແລະຕ່າງປະເທດເຂົ້າຮ່ວມ ແລະມີຜູ້ແທນຝ່າຍບ້ານເມືອງເຂົ້າຮ່ວມ ພະນະທ່ານພູມີ ວົງວິຈິຕ ຮອງປະທານປະເທດ ປະທານສູນກາງແນວລາວສ້າງຊາດເປັນກຽດເຂົ້າຮ່ວມ ພ້ອມທັງປາໄສ ໃນທີ່ປະຊຸມ ຈຸດປະສົງຂອງການປະຊຸມໃນຄັ້ງນີ້ ແມ່ນ ເພື່ອປັບປຸງການຈັດຕັ້ງຂອງ ອົງການພຸດທະສາສະນາ ຂັ້ນຕ່າງໆ ໃຫ້ດີກວ່າເກົ່າ ແລະເສິີມຂະຫຍາຍບົດບາດຂອງພຣະສົງລາວ ໃນການນຳເອົາ ຫຼັກທັມຄຳສັ່ງສອນ ໃນທາງພຣະພຸດທະສາສະນາ ເຂົ້າໄປມີບົດບາດໃນນະໂຍບາຍຂອງພັກ ແລະລັດ ທີ່ໄດ້ວາງອອກ ແລະເຜີຍແຜ່ສີລທັມ ໃຫ້ອອກຕົນຍາດໂຍມໄດ້ເຂົ້າໃຈໃນຫລັກ ທັມຄຳສອນ ທີ່ເປັນຄຸນງາມຄວາມດີ ພ້ອມກັບຮັກສາຄວາມບໍຣິສຸດແຫ່ງພຣະພຸດທະສາສະນາ ເພື່ອບໍ່ໃຫ້ໃຜມາທຳລາຍໄດ້ ຄຽງຄູ່ກັບການພັດທະນາບ້ານເມືອງຕາມນະໂຍບາຍຂອງ ພັກ ລັດ ທີ່ໄດ້ວາງອອກນັ້ນ

ຮູບພາບ ທຸງຫຼາກສີ ທີ່ເປັນສັນຍາລັກ ຂອງພຮະພຸດທະສາສນາ

4.   ກອງປະຊຸມໃຫຍ່ຜູ້ແທນພຣະສົງທົ່ວປະເທດຄັ້ງທີ 4-5

ໃນ 5 ປີຕໍ່ມາ ອົງການພຣະພຸດທະສາສະນາ ຫລື ອ.ພ.ສ. ໄດ້ໄຂຂຶ້ນຢ່າງເປັນທາງການອີກຄັ້ງ ທີ່ ສາລາໂຮງທັມ ວັດມະຫາພຸດທະວົງ ໂສກປ່າຫລວງ ໂດຍມີຕົວແທນພຣະສົງໃນທົ່ວປະເທດເຂົ້າຮ່ວມປະຊຸມ ແລະຄະນະຜູ້ແທນຝ່າຍບ້ານເມືອງ ມີ ທ່ານອຸດົມ ຂັນຕິຍະວົງ,  ທ່ານສີສະຫວາດ ແກ້ວບຸນພັນ ກອງປະຊຸມດັ່ງກ່າວໄດ້ມີມະຕິແຕ່ງຕັ້ງ ກັມມາທິການສູນກາງ ອ.ພ.ສ. ໃນນັ້ນ ຄະນະປະຈຳ 9 ອົງ ກັມມາທິການ ກິຕຕິມະສັກ 9 ອົງ ແລະທີ່ສຳຄັນໃນກອງປະຊຸມຄັ້ງນີ້ ແມ່ນກອງປະຊູມໄດ້ມີມະຕິ ແຕ່ງຕັ້ງ 4 ກັມມາທິການ ຄື

1.   ກັມມາທິການປົກຄອງສົງແລະຄຸ້ມຄອງພຣະພຸດທະສາສະນາ

2.  ກັມມາທິການສຶກສາສົງ

3.  ກັມມາທິການເຜີຍແພ່ສີລທັມ ແລະປະຕິບັຕວິປັສສະນາກັມມະຖານ

4.  ກັມມາທິການສາທາລະນູປະການ

5.   ກອງປະຊຸມໃຫຍ່ຜູ້ແທນພຣະສົງທົ່ວປະເທດຄັ້ງທີ 6

ປີ ຄ.ສ. 2011 ອົງການພຣະພຸດທະສາສະນາ ໄດ້ເປິດກອງປະຊູມໃຫຍ່ຜູ້ແທນພຣະສົງທົ່ວປະເທດຂຶ້ນອີກຄັ້ງ ທີ່ ຫໍທັມມະສະພາ ວັດທາດຫລວງເຫນືອ ນະຄອນຫລວງວຽງຈັນ ຈຸດປະສົງຫລັກຂອງການປະຊຸມໃນຄັ້ງນີ້ ແມ່ນເລືອກຕັ້ງ ປະທານ ອົງການພຣະພຸດທະສາສະນາສຳພັນລາວ ອົງໃຫມ່ ແທນພຣະອາຈາຣຍ໌ໃຫຍ່ມະຫາວິຈິຕ ສິງຫາຣາຊ ປະທານ ສູນກາງ ອ.ພ.ສ. ອົງເກົ່າ ທີ່ໄດ້ມໍຣະນະພາບໄປ ແລະເພື່ອປັບປຸງ ລະບົບການບໍຣິຫານງານ ການຈັດຕັ້ງໃນ 4 ກັມມາທິການໃຫ້ດີເພິ່ມຕື່ມອີກດ້ວຍ. ໂດຍຖືເປັນກຽດເຂົ້າຮ່ວມກອງປະຊຸມຂອງ ພະນະທ່ານທອງລຸນ ສີສຸລິດ ຮອງນາຍົກລັດຖະມົນຕຣີ ແລະລັດຖະມົນຕຣີ ກະຊວງການຕ່າງປະເທດ.

6.   ກອງປະຊຸມໃ ຫຍ່ຜູ້ແທນພຣະສົງທົ່ວປະເທດຄັ້ງທີ 7

ໃນວັນທີ 19-20 ເດືອນ 9 ພ.ສ. 2559 ຄ.ສ. 2016 ກອງປະຊຸມໃຫຍ່ຜູ້ແທນພຣະສົງທົ່ວປະເທດໄດ້ໄຂຂຶ້ນຢ່າງເປັນທາງການ ທີ່ ສູນການຮ່ວມມືສາກົນ ແລະການຝຶກອົບຮົມ ICTC (International Cooperation and training Center) ຫລັກ 5 ນະຄອນຫລວງວຽງຈັນ ໂດຍມີ ພຣະອັຄຄະມະຫາສັທທັມມະໂຊຕິກະທະຊະ (ຍາທ່ານໃຫຍ່ມະຫາງອນ ດຳຣົງບຸນ) ອົງທີ 5 ແຫ່ງຄະນະສົງລາວ ທົ່ວປະເທດ ເປັນປະທານຝ່າຍພຣະສົງ ເຊິ່ງໄດ້ ຖືກແຕ່ງຕັ້ງກ່ອນຫນ້ານີ້ ເມື່ອວັນທີ 17 ທັນວາ ປີ ຄ.ສ. 2015 ແທນປະທານອົງທີ່ ມໍຣະນະພາບໄປ ຄື ຍາທ່ານໃຫຍ່ມະຫາຜ່ອງ ສະມາເລີກ, ຍາທ່ານມະຫາມີ.... ພຣະສົງທົ່ວປະເທດເຂົ້າຮ່ວມທັງຫມົດ ..... ແລະປະທານຝ່າຍຄະລຶຫັດ ແມ່ນ ທ່ານໄຊສົມພອນ ພົມວິຫານ ນອກຈາກນີ້ຍັງມີປະທານອົງການພຣະພຸດທະສາສະນາ ຈາກ ສ.ສ ຫວຽດນາມ ຄື ພຣະອາຈານໃຫຍ່ທິດທຽນເຍືອນ ແລະທ່ານຫມິງຢີ້ ວັດຫລົວຕິ່ງ ຫລິງຊັນ ສປ. ຈີນ, ມູນນິທິໂພທິຄະຍາ ວິດຊາໄລ ຣາຊະອານາຈັກໄທ ຊຸມນຸມນິສິດ ນັກສຶກສາລາວ ທີ່ໄປສຶກສາຢູ່ໃນ ຣາຊະອານາຈັກໄທ ຈາກທົ່ວປະເທດ ເຂົ້າຮ່ວມອີກດ້ວຍ ເພື່ອໃຫ້ກອງປະຊຸມດຳເນີນໄປຢ່າງມີຄຸນຄ່າ ຈຶ່ງໄດ້ມີການສະແດງຄວາມຄິດ ຄວາມເຫັນໃນທີ່ປະຊຸມ ໂດຍການຕາງຫນ້າຂອງແຕ່ລະ ອົງການ ຫນ່ວຍງານ ທັງພາຍໃນ  ແລະຕ່າງປະເທດ ບໍ່ວ່າຈະເປັນ ຈາກກະຊວງພາຍໃນ ຂຶ້ນປະກອບຄວາມເຫັນໃນຫົວຂໍ້ “ການຄຸ້ມຄອງລັດ ຕໍ່ວຽກງານສາສະນາໃນ ສປປ.ລາວ”, ຈາກ ກະຊວງສຶກສາທິການ ສະແດງຄວາມຄິດເຫັນໃນຫົວຂໍ້ “ຄວາມສຳຄັນຂອງການສຶກສາສົງໃນປັດຈຸບັນ”, ຈາກກະຊວງຖະແຫລງຂ່າວ ວັດທະນະທັມ ແລະ ທ່ອງທ່ຽວ ສະແດງຄວາມຄິດເຫັນໃນຫົວຂໍ້ “ການມີສ່ວນຮ່ວມຂອງພຣະສົງກັບການອະນຸລັກຮັກສາປູຊະນີຍະສະຖານ ແລະ ວັດຖຸບູຮານໃນທາງພຣະພຸດທະສາສະນາ” ຈາກສູນກາງຊາວຫນຸ່ມປະຊາຊົນປະຕິວັດລາວ ສະແດງຄວາມຄິດເຫັນໃນຫົວຂໍ້ “ການມີສ່ວນຮ່ວມຂອງພຣະສົງກັບການສຶກສາອົບຮົມຊາວຫນູ່ມເຍົາວະຊົນລາວ” ຈາກ ສູນກາງສະຫະພັນແມ່ຍິງລາວ ສະແດງຄວາມຄິດເຫັນໃນຫົວຂໍ້ “ບົດບາດຂອງແມ່ຍິງລາວກັບການອຸປະຖຳພຣະພຸດທະສາສະນາ” ນອກຈາກນີ້ຍັງມີປະທານອົງການພຣະພຸດທະສາສະນາສຳພັນລາວແຂວງອື່ນໆ ທີ່ຂຶ້ນປະກອບຄວາມເຫັນ ມີ ແຂວງສະຫວັນນະເຂດ ສະແດງຄວາມຄິດເຫັນໃນຫົວຂໍ້ “ວຽກງານສາທາລະນູປະການ ແລະການເຜີຍແຜ່ສີລທັມທີ່ພົ້ນເດັ່ນພາຍໃນແຂວງສະຫວັນນະເຂດ ໂດຍ ພະອາຈານໃຫຍ່ ມະຫາສົມບູນ ສິຣິປັນໂຍ ປະທານອົງການພຸດທະສາສະນາສໍາພັນລາວແຂວງສະຫວັນນະເຂດ, ປະທານ ອ.ພ.ສ. ແຂວງຫລວງພຣະບາງ, ປະທານ ອ.ພ.ສ. ແຂວງຈຳປາສັກ ແລະຈາກຜູ້ຊົງຄຸນນະວຸທິ ທີ່ໄດ້ເຊີນເຂົ້າມາຮ່ວມອີກ ຫລາຍໆ ທ່ານ

- ຂໍ້ມູນຈາກ ຫ້ອງການສູນກາງ ອພສ ໂດຍ ພຣະ ອຈ ປທ ພູຄໍາ ຮອງຫົວໜ້າຫ້ອງການສູນກາງອພສ

ທຸກຄົນກໍ່ເປັນຜູ້ໃຫ້ໄດ້

ການເປັນຜູ້ໃຫ້ ຫາກທ່ານຄິດວ່າ ການເປັນຜູ້ໃຫ້ນັ້ນ ຈະຕ້ອງເປັນຄົນມີຍົດຖາບັນດາສັກ

ຕ້ອງເປັນຜູ້ທີ່ມີເງີນຫຼາຍ ຈຶ່ງຈະມີເງີນບໍລິຈາກ ຈົົນກາຍເປັນຜູ້ໃຫ້ທີ່ສົມບູນໄດ້

ທ່ານຄິດຜິດແລ້ວ  ຫຼາຍຄົນຄິດວ່າ ເຮົາຍັງຄົງເປັນຜູ້ໃຫ້ບໍ່ໄດ້ເພາະເຮົາຍັງບໍ່ລວຍ

ທີ່ຈິງແລ້ວທຸກຄົນເປັນຄົນລວຍຢູ່ແລ້ວ ແລ້ວລວຍຫຼາຍພ້ອມອີກຕ່າງຫາກ

ເມື່ອສະໄໝຄັ້ງພຸດທະການ

ມີຊາຍຜູ້ທຸກຍາກຄົນໜຶ່ງ ຖາມພຣະພຸດທະເຈົ້າວ່າ

“ເຫດໃດຂ້າພະເຈົ້າຈຶ່ງທຸກຍາກຍິ່ງແທ້”

ພຣະພຸດທະເຈົ້າຈຶ່ງຕອບວ່າ

“ເພາະທ່ານຍັງບໍ່ຮູ້ຈັກການໃຫ້”

ຊາຍຜູ້ທຸກຍາກຈຶ່ງເວົ້າຕໍ່ອີກວ່າ

“ທັ້ງໆທີ່ຂ້າພະເຈົ້າບໍ່ມີສິ່ງໃດຈະໃຫ້ນີ້ຫວາ!!”

ພຣະພຸດທະເຈົ້າຕອບວ່າ ທ່ານມີຢູ່ບໍ່ໜ້ອຍເລີຍ!

ທ່ານມີໃບໜ້າ

ເຊິ່ງສາມາດໃຫ້ຮອຍຍິ້ມ ໃຫ້ຄວາມສົດໃສ ແລະ ໃຫ້ເບີກບານແກ່ຜູ້ອື່ນໄດ້

ທ່ານມີປາກ

ເຊິ່ງສາມາດໃຫ້ຄໍາຊື່ນຊົມ ໃຫ້ກຳລັງໃຈ

ທ່ານມີຫົວໃຈ

ເຊິ່ງສາມາດເປີດຮັບຟັງ ໃຫ້ຄວາມຈິງໃຈ ໃຫ້ອະໄພ ໃຫ້ຄວາມເມດຕາແກ່ຜູ້ອື່ນໄດ້

ທ່ານມີດວງຕາ

ເຊິ່ງສາມາດເບີ່ງຜູ້ອື່ນດ້ວຍສາຍຕາແຫ່ງຄວາມຫວັງດີ ແລະ ໂອບອ້ອມອາລີໄດ້

ແລະ ທ່ານ ມີຮ່າງກາຍ

ເຊິ່ງສາມາດຊ່ວຍເຫຼືອຜູ້ອື່ນໄດ້ສະເໝີ

ສະນັ້ນ; ແທ້ຈິງແລ້ວເຮົາບໍ່ໄດ້ທຸກຍາກເລີຍ

ເຮົາເປັນຜຸ້ໃຫ້ໄດ້ ຖ້າເຮົາພ້ອມທີ່ຈະເປັນຜູ້ໃຫ້...!

ດ້ວຍຄວາມຈິງໃຈ ເຖິງເຮົາບໍ່ມີວັດຖຸ ຫຼື ປັດໃຈ ເຮົາກໍ່ສາມາດໃຫ້ສິ່ງອື່ນໄດ້ເຊັ່ນດຽວກັນ...

ທ່ານຢ່າລືມວ່າ ການໄດ້ແບ່ງປັນ ໄດ້ຊ່ວຍເຫຼືອ ໄດ້ໃຫ້ຄວາມຮັກ ໃຫ້ໂອກາດ ໃຫ້ນໍ້າໃຈ 

ແລະ ໃຫ້ອະໄພ ຄືຄວາມສຸກທີ່ຍິ່ງໃຫຍ່ ຢ່າງປະເມີນຄ່າບໍ່ໄດ້

ນີ້ຄືຂໍ້ຄິດ ຈາກ ວຽງສະຫວັນ ສິງຫາວົງ ຂໍໃຫ້ທ່ານໃຊ້ຊີວິດຢ່າງຊົງພະລັງ ແລະ ມີຄວາມສຸກ 

ເບີ່ງວີດີໂອດ້ານລຸ່ມ(ຄຣິບຕົ້ນສະບັບ)

ຄຣິບ ວີດີໂອ ທີ່ດັດແປງແລ້ວ

ທິດທັງຫົກ(6) ໃນຄໍາສອນຂອງພຸດທະສາສນາໝາຍເຖິງຫັຍງ? ແລະ ມີຫຍັງແດ່?

ໜັງສື ທິດທັງຫົກ(6) ເປັນໜັງສືທັມມະເຫຼັ້ມທໍາອິດໃນຊີວິດ ທີ່ອັດຕະມາ ໄດ້ອ່ານຕັ້ງແຕ່ບວດ ເປັນຈົວນ້ອຍໆ ແລະ ຈົນປັດຈຸບັນກະຍັງຈື່ມາຕລອດ ເຖິງວ່າຈະບໍ່ຈື່ເນື້ອຄວາມໄດ້ທັງໝົດ ແຕ່ຍັງພໍຈໍາໄດ້ຄວາມໝາຍບາງສ່ວນ, ທິດທັງ6 ໃນທາງພຸດທະສາສນາ ບໍ່ໄດ້ໝາຍເທິງ ທິດໃຕ້-ເໜືອ-ຕາເວັນອອກ-ຕາເວັນຕົກ ຫຼື ທິດອື່ນໆ ໃນແບບພູມສາດ ແຕ່ເປັນການຕີຄວາມໝາຍ ໃນແບບສະເພາະທີ່ບໍ່ຄືສາສນາໃດ ແລະ ເປັນການໃຫ້ຄວາມໝາຍໃນເຊີງປັດສະຍາ ຕີອອກມາທຽບໃສ່ ຄົນອ້ອມຂ້າງ ທີ່ເຮົາຕ້ອງພົບເຈີໃນປັດຈຸບັນ, ກວມລວມເອົາຄົນທຸກລະດັບ ຕັ້ງແຕ່ຄົນຮັບໃຊ້ ທາສ ກັມມະກອນ ຮອດພຣະຣາຊາ ຜູ້ປົກຄອງປະເທດ, ແລ້ວເອົາມາທຽບໃສ່ ທິດທັງ6. ບາງຄົນເຫັນຫົວຂໍ້ຄັ້ງແລກ ແມ່ນຈະຄິດໄປວ່າ ເປັນທິດໃຕ້-ເໝືອ ຫຼື ທິດອື່ນ ແຕ່ໃນທາງພຸດ ພຣະພຸດທະເຈົ້າໄດ້ຕີຄວາມໝາຍ ແລະ ທຽບຄວາມອອກມາດັ່ງນີ້:

- ທິດເບື້ອງລຸ່ມ ປຽບເໝືອນຄົນຮັບໃຊ້ ຫລື ກັມມະກອນດັ່ງນີ້:

1. ສິ່ງທີ່ຄົນຮັບໃຊ້ ຫລືກັມມະກອນຄວນປະຕິບັດຕໍ່ເຈົ້ານາຍ 5 ປະການ ຄື:
1.1. ຕື່ນເດິກໄປເຮັດວຽກກ່ອນເຈົ້ານາຍ,ໄປວຽກໄປການໃຫ້ທັນເວລາ.
1.2. ເວລາເລີກງານໃຫ້ເລີກຕາມຫລັງເຈົ້ານາຍ,ບໍ່ລັກເມືອກ່ອນໂມງເລີກການ.
1.3. ເຈົ້ານາຍໃຫ້ສິ່ງຂອງອັນໃດຈຶ່ງເອົາ,ບໍ່ລັກເອົາຂອງເຈົ້ານາຍ ຫລືຂອງຫ້ອງການ ຂອງສ່ວນລວມ.
1.4. ເຮັດວຽກໃຫ້ດີທີ່ສຸດ.
1.5. ເອົາກຽດຕິຄຸນອັນດີຂອງເຈົ້ານາຍໄປລໍ່າລື.

2. ເຈົ້ານາຍ ຄວນປະຕິບັດຕໍ່ຄົນຮັບໃຊ້ ຫລືກັມມະກອນ ດ່ັງນີ້:
2.1. ໃຊ້ໃຫ້ເຮັດວຽກຕາມກຳລັງຄວາມສາມາດ.
2.2. ແບ່ງອາຫານການກິນແລະໃຫ້ລາງວັນ.
2.3. ເບິ່ງແຍງປິ່ນປົວຍາມເຈັບເປັນ.
2.4. ແບ່ງປັນອາຫານທີ່ພິເສດໃຫ້ກິນ ຫລື ໃຫ້ຂອງພິເສດ.
2.5. ວັນຢຸດ,ວັນງານສຳຄັນກໍ່ຢຸດໃຫ້ພັກຜ່ອນຕາມໂອກາດ.

- ທິດເບື້ອງຊ້າຍ ປຽບເໝືອນ ຫມູ່ເພື່ອນ ມິຕສະຫາຍ ດ່ັງນີ້:

1. ສິ່ງທີ່ຄວນປະຕິບັດຕໍ່ມິຕສະຫາຍ 5 ປະການ ຄື:
1.1. ດ້ວຍການແບ່ງປັນວັດຖຸສິ່ງຂອງ,ຄວາມຄິດ ຄຳແນະນຳ.
1.2. ເວົ້າຈາມ່ວນ ດີ ມີປະໂຫຍດ.
1.3. ປະພຶດຕົນໃນສິ່ງທີ່ເປັນປະໂຫຍດ.
1.4. ວາງຕົນໃຫ້ສະເໝີກັນ ບໍ່ຍົກຕົນ ຫລືຖ່ອມຕົນເກີນໄປ.
1.5. ບໍ່ເວົ້າຈາໃນສິ່ງທີ່ຈະແຕກຄວາມສາມັກຄີກັນ.

2. ເມື່ອມິຕສະຫາຍທີ່ດີຄວນປະຕິບັດຕໍ່ກັນ 5 ປະການ.
2.1.ປົກປ້ອງຮັກສາເພື່ອນມິດຜູ້ປະໝາດແລ້ວ.
2.2.ປົກປ້ອງຮັກສາຊັບຂອງມິດຜູ້ປະໝາດແລ້ວ.
2.3.ເປັນທີ່ເພິ່ງແກ່ມິດເມື່ອມີພັຍ.
2.4.ບໍ່ທອດຖິ້ມໃນຍາມມີອັນຕຣາຍ.
2.5.ນັບຖືສະມາຊິກໃນວົງຕະກູນຂອງມິຕ.

- ທິດເບື້ອງຫຼັງ ປຽບເໝືອນ ພັນລະຍາ ແລະ ສາມີ ດ່ັງນີ້:

1. ສິ່ງທີ່ສາມີຄວນປະຕິບັດຕໍ່ພັນລະຍາ 5 ປະການ ຄື:
1.1. ຍົກຍ້ອງໃຫ້ກຽດ ນັບຖືວ່າເປັນເມຍ.
1.2. ບໍ່ດູຖູກດູໝິ່ນພັນລະຍາ.
1.3. ຊື່ສັດຕໍ່ກັນບໍ່ປະພຶດນອກໃຈ.
1.4. ມອບຄວາມເປັນໃຫຍ່ຢູ່ໃນເຮືອນໃຫ້ພັນລະຍາ.
1.5. ໃຫ້ຂອງພິເສດ ເຄື່ອງປະດັບໃນໂອກາດຕ່າງໆ.

2. ສິ່ງທີ່ພັນລະຍາຄວນປະຕິບັດຕໍ່ສາມີ 5 ປະການ ຄື:
2.1. ເຮັດວຽກການງານ ຕົກແຕ່ງຈັດແຈງດີ.
2.2. ສົງເຄາະເອື້ອເຟື້ອຄົນຂ້າງຄຽງຂອງສາມີ ດີ.
2.3. ບໍ່ນອກໃຈສາມີ.
2.4. ຮັກສາຊັບທີ່ສາມີຫາມາໄດ້ໄວ້ໃຫ້ດີ.
2.5. ດຸໝັ່ນຂຍັນໃນວຽກງານທັງປວງ.

- ທິດເບື້ອງໜ້າ ປຽບເໝືອນ ພໍ່ແມ່ ດັ່ງນີ້:

1. ສິ່ງທີ່ພໍ່ແມ່ຄວນປະຕິບັດຕໍ່ລູກ 5 ປະການ ຄື:
1.1. ຫ້າມບໍ່ໃຫ້ລູກເຮັດຄວາມຊົ່ວທັງປວງ.
1.2. ສອນໃຫ້ລູກຕັ້ງໝັ້ນຢູ່ໃນຄວາມດີ.
1.3. ສົ່ງເສີມໃຫ້ມີການສຶກສາທີ່ດີ.
1.4. ໃຫ້ມີຄູ່ຄອງ(ພັນລະຍາຫລືສາມີ)ທີ່ດີ.
1.5. ມອບຊັບມໍຣະດົກໃຫ້ເມື່ອເວລາສົມຄວນ.

2. ສິ່ງທີ່ລູກຄວນປະຕິບັດຕໍ່ພໍ່ແມ່ 5 ປະການ ຄື:
2.1. ພໍ່ແມ່ລ້ຽງດູເຮົາມາແລ້ວ ເຮົາຄວນລ້ຽງດູເພິ່ນຕອບແທນ.
2.2. ເຮັດວຽກງານແທນພໍ່ແມ່.
2.3. ຮັກສາຊື່ສຽງວົງຕະກູນບໍ່ໃຫ້ເສື່ອມເສັຍ.
2.4. ປະພຶດຕົນເປັນຄົນດີໃຫ້ສົມຄວນທີ່ພໍ່ແມ່ຈະມອບຊັບມໍຣະດົກໃຫ້ສືບຕະກູນຕໍ່ໄປ.
2.5. ເມື່ອພໍ່ແມ່ສິ້ນຊີວິດໄປແລ້ວເຮົາຈະເຮັດບຸນອຸທິສໃຫ້ເພິ່ນ.

- ທິດເບື້ອງຂວາ ປຽບເໝືອນ ຄູອາຈານ ດັ່ງນີ້:

1. ສິ່ງທີ່ຄູຄວນປະຕິບັດຕໍ່ລູກສິດ 5 ປະການ.
1.1. ແນະນຳດີ.
1.2. ໃຫ້ການສຶກສາທີ່ດີ.
1.3. ບອກສອນວິຊາໃຫ້ໂດຍສິ້ນເຊີງ ບໍ່ມີປິດບັງ.
1.4. ຍ້ອງຍໍໃຫ້ປະກົດຕໍ່ໜ້າໝູ່ເພື່ອນ.
1.5. ປົກປ້ອງຄຸ້ມຄອງອັນຕລາຍໃນທິດທັງປວງ.

2. ສິ່ງທີ່ລູກສິດຄວນປະຕິບັດຕໍ່ຄູອາຈານ 5 ປະການ.
1.1. ດ້ວຍການລຸກຂຶ້ນຕອນຮັບ ຈັດຂອງຕ້ອນຮັບຕາມຄວາມເມາະສົມ ເຊັ່ນນໍ້າດື່ມເປັນຕົ້ນ.
1.2. ໄປປະຕິບັດຄອຍຮັບໃຊ້.
1.3. ເຊື່ອຟັງຄຳແນະນຳສັ່ງສອນຕັກເຕືອນ.
1.4. ປະຕິບັດອຸປະຖາກດູແລ.
1.5. ທຳການສຶກສາສີລະປະວິທະຍາດ້ວຍຄວາມເຄົາຣົພ.

- ທິດເບື້ອງເທິງ ປຽບເໝືອນ ພຣະສົງສາມະເນນ, ສະມະນະ, ນັກບວດ ດັ່ງນີ້:

1. ສິ່ງທີ່ຄວນປະຕິບັດຕໍ່ພຣະສົງສາມະເນນ,ສະມະນະ,ນັກບວດ 5 ປະການ.
1.1. ປະຕິບັດຕໍ່ເພິ່ນດ້ວຍຄວາມອ່ອນນ້ອມມີເມຕຕາທາງກາຍ.
1.2. ປະຕິບັດຕໍ່ເພິ່ນດ້ວຍວານາອ່ອນນ້ອມ ມີເມຕຕາ.
1.3. ປະຕິບັດຕໍ່ເພິ່ນດ້ວຍຄວາມອ່ອນນ້ອມມີເມຕຕາທາງໃຈ.
1.4. ໃຫ້ການຮັບຕ້ອນດ້ວຍຄວາມຍິນດີ(ບໍ່ອັດປະຕູດ້ວຍການບໍ່ຕ້ອນຮັບ).
1.5. ຢູ່ໃກ້ຊິດ ຄອຍຖວາຍສິ່ງທີ່ຄວນຖວາຍ.

2. ພຣະສົງສາມະເນນ,ສະມະນະ ຫລືນັກບວດ ຄວນໃຫ້ການອະນຸເຄາະ 6 ະການ.
2.1. ຫ້າມບໍ່ໃຫ້ເຮັດຄວາມຊົ່ວທັງປວງ.
2.2. ສອນໃຫ້ຕັ້ງໝັ້ນຢູ່ໃນຄວາມດີ.
2.3. ອະນຸເຄາະດ້ວຍຈິຕໃຈອັນງົດງາມ.
2.4. ໃຫ້ຟັງທັມອັນຍິ່ງໆຂຶ້ນໄປທີ່ຍັງບໍເຄີຍໄດ້ຟັງ.
2.5. ອະທິບາຍສິ່ງທີ່ໄດ້ຟັງມາແລ້ວໃຫ້ເເຈ່ມແຈ້ງ.
2.6. ບອກທາງໄປສະຫວັນໃຫ້.

ຖ້າອ່ານຈົບ ຈະເຫັນໄດ້ວ່າ ພຽງແຕ່ທັມມະໝວດດຽວ ກໍ່ຄວບຄຸມ ເກືອບທຸກຊັ້ນຄົນ ທັງໃນອາດີດ ແລະ ປັດຈຸບັນ

cr: http://suchart.rmutl.ac.th/Misc/Direction.php ແລະ https://web.facebook.com/WatLaoVirginia/posts/712477305619729?pnref=story